Одӥг нунал Минскын

Поездын вазь ӵукна сайкасько. Югыт ини. Секыт оскыны, мон мукет шаерын ини шуыса. Кондуктор билетме берлань сётэ но шуэ: «Скоро будем в Минске!»

Поезд Минск вокзалын дугдэ, мон вокзалэ пырисько. Нырысетӥ тужгес но кулэ луись уж – багажме кельтоно. Собере кассаын Вильнюсэ билетме оформить кароно. Город мыным тодмотэм. Мон татын чик огнам но Минскын эшъёсы ӧвӧл. Киоскысь картаез басьтыса вокзалысь потӥсько.

Артысь МакДональдсэ пырисько. Мон валасько, отысь сиён ӟеч ӧвӧл, нош сиеме потэ но умойгес интыосты уг тодӥськы. МакДональдсысен но валай, мон Минскын компанитэк гинэ уг лу. Мон интернеттэк но луо, малы ке шуоно публичной вай-файлы пароль кулэ. Нош мынам картае вань, но мон калгыны вырӟисько. Минскын куазь туж шулдыр но пӧсь. Гудырикошкон вал ни. шуыны уг луы  вал, соку зортолэзь вал шуыса.

Плошча Нелалежнасці

Городытӥ мынӥсько, юртъёс вылын ваньмыз беларус кылын гожтэмын. Нош беларус сямен нокин уг вераськы. Ижкарысен удмурт кылэз кылыны капчигес. Независимость Карлудын (бел. Плошча Незалежнасьці. Бел. ч чурыт удм. ӵ кадь). Отын католик черке пырисько но отын служба поляк кылын мынэ. Священниклэн акцентэзъя валай, со Польшаысь шуыса (Беларусӥысь но Литваысь полякъёс мукет акцентэн верасько. Беларусӥын тужгес но тросэз  католикъёс – полякъёс). Азьлань мынӥсько но туспуктӥсько. Минскын  туж трос Сталин дыръя пуктэм юртъёс.

Минскын пичи вуж город вань. Отын православной черк сылэ, нош со католик черк кадь адӟиське (азьлогес со зэмзэ но католик вылэм). Черке пырисько, отын Литургия ортче. Нош мон отчӥ кемалы ӧй кыльы. Причаститься кариськыны мыным уг яра вал, малы ке шуоно мон сиськи вал.

Кафедральный собор Сошествия Святого Духа (православный)

Вуж город пала мынӥсько. Отын туж чебер. Вань юртъёс выльдэмын. Со шундыӝужан Польшаысь пичи вуж городъёс городъёслы укша. Таӵе архитектура Литваын но шеде. Лумбыт Минскытӥ отчы –татчы калгисько, юртъёсты, карлудъёсты, паркъёсты, черкъёсты но мукет интыосты учкисько но туспуктӥсько. Вуж городын сиськыно кариськи. «Скромный Буржуй» Ресторанэ лыктӥ но ӵӧж но сур заказтӥ. Отын вай-фай но вал. Дуно ӧй вал, 130 000 беларус манет тыри (472 ӟуч манет. Вуоно аре беларус манетлэн деноминациез ортчоз 1:10 000).

Собере нош ик городытӥ калги. Кӧня ке мӧзмыт луиз, малы ке шуоно лумбыт огнам. Каллен вокзал пала мынӥ. Минскысь 19.00 котырын кошки. Поезд туж ӝог, Минскысь Вильнюсозь кык но ӝыны час мынэ. Беларусь пала мыныку кунгож контроль поездын ортче, нош Литвае мыныку -  Вильнюсысь вокзалын.

Бер ӝытазе Литвае лыктӥ но отын вить нунал ортчытӥ.