9 сентября 2015 г.

Гужем каникулэ Удмуртиын

Та арын нырысетӥзэ Удмуртие ветлӥ. Отын куинь арня ортчытӥ. Инъетась ужпум удмурт кылъя курсъёс вал. Соос Удмурт Элькун Университетын ортчизы.
Хельсинкиысь Ижкарозь Сюрес туж кузь, нош со мыным мӧзмыт ӧй вал. Нырысетӥ нуналаз Петыркарозь гинэ мынӥ, отын бускелелэн туганэзлэн квартираяз кӧлӥ вал (бускеле эстониысь ӟуч, нош нылашез Ижкарын вордӥськемын, Питерын дышетске). Ижкаре Сюрес мӧзмыт ӧй вал, малы ке шуоно бускеленым ӵош мынӥмы вал.
Ижкаре лыктыса шулдыр вал. Ӧй оскы вал, милемлы туж умой огъулонни сётозы шуыса. Отын пӧсь ву одӥг арня ӵоже гинэ вал, нош со кышкыт ӧй вал. 
Туж умой, мынам удмурт эшъёсы ини вал шуыса. Соосын Ижкарын пумиськи. Контакт пыр гинэ тодмоосыныз но пумиськи но тодматски
Мыным туж кельшиз культурной программа. Ми пӧртэм интыосы ветлӥм. Воткакарысен Чайковскийлэсь усадьбазэ учким. Жаляса верано, кырын зоре вал, соин городытӥ ветлыны секыт вал. Нош сарапулысен трослы умойгес куазь вал, соин сое учкыны быгатӥм. Отын трос чебер вуж корка но Кам шур вань.
Эшшо но тунсыкогес гуртъёсы ветлэммы вал. Ми Быгыысь финн-угор сиён фестивале вуылӥм. Туж ческыт отын сиськи. Туж тумошо вал, сцена вылэ тубыса нимъёсмес  ваньзылы вераны. одӥг кырӟанэз Финн кылын но кырӟамы.
Мон Сизьгуртэ (Алнаш ёрос) но ветлӥ. Со программаын ӧй вал, мон отчы огнам мынӥ. Отын монэ одӥг эше пумитаз. Солэн анаез табань пӧраз. Мукет ческыт сиёнэн но куноятӥзы. Эше мыным гуртсэ возьматӥз, губи но узы-боры бичаны ветлӥм. Мынам удмурт кылын вераськеме пӧрмиз, ӟуч кылын кӧня ке гинэ вераськоно вал. Сюрес Сизьгуртэ но тунсыко вал, малы ке шуоно Огырчи ёрос (Татарстан) пыр мынӥм. Отын гуртъёсын мечетьёс вал.
Программая шутэтскон нуналъёсмес удмуртъёс дорын ортчытылӥм. Мон Вуж Мӧняла мынӥ вуылӥ. Жаляса верано, со туж шулдыр ик ӧй вал, малы ке шуоно отын сюан вал но монэ сектазы. Собере туж секыт вал. Нош ачиз гурт мыным кельшиз. Машинаен но ворттылӥм, тунсыко интыосыз учким.
Брангуртысь дано песянайёсын но пумиськимы. Соос милемлы трос кырӟазы но эктӥзы. Выль черксэз но возьматӥзы.
Мукет гуртъёс Уддяди (Карамас-Пельга) но Альман (Якшур-Бӧдья ёрос) вал. Уддядиысен ми удмурт калык дӥськут дӥсям но сюан шудӥм. Собере сиським но мунчое ветлӥм. Соку Дмитрий Анатольевич мыным вераз, со бускелелэсь туганзэ финн кыллы дышетӥз вал шуыса. Макем пичи та дунне.
Альманысен милемлы возьматӥзы, кызьы мушъёсыз вордыны кулэ. Отын но тыр ӝӧкен витё вал милемыз но трос табань но мунчо.
Ижын но тунсыко культурной программа вал. Кылсярысь, ми Эктон Коркаен эктӥм но проф. Кельмаковен кырӟамы. Калашниковлэн музейяз но Эшъяськон юртэ ветлӥм.
Ижын но трос пумиськонъёс вал, кудъёсыз программаын ӧй вал. Кылсярысь, лекциос САХАРЫН яке огшоры пумиськонъёс интыысь эшъёсын.
Дыр Ижын ӝог ортчиз но куинь арня мыным укыр ӧжыт вал. Мынам нош ик Иже мынэме потэ. Ижкарысь мон Литвае бертӥ. Мынон сямен кык нунал Мускоын ортчытӥ но одӥг нунал Минскын. Нош та городъёс сярысь нимаз гожтоно.